*श्री सत्यनारायण अष्टकम*
आदिदेवं जगत्कारणं श्रीधरं
लोकनाथं विभुं व्यापकं शङ्करम् ।
सर्वभक्तेष्टदं मुक्तिदं माधवं
सत्यनारायणं विष्णुमीशं भजे || १ ||
सर्वदा लोक-कल्याण-पारायणं देव-गो-विप्र-रक्षार्थ-सद्विग्रहम् ।
दीन-हीनात्म-भक्ताश्रयं सुन्दरं
सत्यनारायणं विष्णुमीशं भजे || २ ||
दक्षिणे यस्य गङ्गा शुभा शोभते
राजते सा रमा यस्य वामे सदा ।
यः प्रसन्नाननो भाति भव्यश्च तं
सत्यनारायणं विष्णुमीशं भजे || ३ ||
संकटे समरे यं जनः सर्वदा
स्वात्मभीनाशनाय स्मरेत् पीडितः ।
पूर्णकृत्यो भवेद् यत्प्रसादाच्च तं
सत्यनारायणं विष्णुमीशं भजे || ४ ||
वाञ्छितं दुर्लभं यो ददाति प्रभुः
साधवे स्वात्मभक्ताय भक्तिप्रियः ।
सर्वभूताश्रयं तं हि विश्वम्भरं
सत्यनारायणं विष्णुमीशं भजे || ५ ||
ब्राह्मणः साधु-वैश्यश्च तुङ्गध्वजो येऽभवन् विश्रुता यस्य भक्त्याऽमरा ।
लीलया यस्य विश्वं ततं तं विभुं
सत्यनारायणं विष्णुमीशं भजे || ६ ||
येन चाब्रह्मबालतृणं धार्यते
सृज्यते पाल्यते सर्वमेतज्जगत् ।
भक्तभावप्रियं श्रीदयासागरं
सत्यनारायणं विष्णुमीशं भजे || ७ ||
सर्वकामप्रदं सर्वदा सत्प्रियं
वन्दितं देववृन्दैर्मुनीन्द्रार्चितम् ।
पुत्र-पौत्रादि-सर्वेष्टदं शाश्वतं
सत्यनारायणं विष्णुमीशं भजे || ८ ||
अष्टकं सत्यदेवस्य भक्त्या नरः भावयुक्तो मुदा यस्त्रिसन्ध्यं पठेत् ।
तस्य नश्यन्ति पापानि तेनाऽग्निना इन्धनानीव शुष्काणि सर्वाणि वै || ९ ||
इति श्रीसत्यनारायणाष्टकं सम्पूर्णम् !!
**************
Comments
Post a Comment